Людзі заўсёды дзяліліся на сваіх і чужых. Для нас гэта настолькі натуральна, што мы практычна не заўважаем гэтай фундаментальнай асновы нашых паводзінаў. А вельмі дарэмна. Разумеючы падобныя рэчы, нашмат прасцей становіцца разумець і самога сябе, і любыя іншыя з'явы, дзе замяшаныя людзі. Гэта нельга не ўлічваць, ігнараваць і лічыць, што ты не такі і можаш быць па-над астатнім статкам. Імкненне дзяліць усіх на сваіх і чужых — частка чалавечай прыроды, і мы нікуды ня можам ад таго падзецца.
Гэтае кароткае відэа — цудоўны матэрыял для пачатку азнаямлення з тэмай статкавых паводзінаў. Роберт Сапольскі вельмі простымі словамі, не губляючы пры гэтым навуковай дакладнасці, дзеліцца з усім светам ведамі.
Прафесар Стэнфардскага ўніверсітэта Роборт Сапольскі — фігура ўнікальная. Калі ты з нейкай прычыны пачаў задавацца пытаннямі пра біялагічныя асновы паводзінаў чалавека, а зрабіць гэта, адмовіўшыся ад паэтычна-імфалагічнага падыходу, уласцівага гуманітарыям, вельмі няпроста, спадар Сапольскі першы, з кім табе варта пазнаёміцца.
Пачынаючы ўнікаць у тэму, заўсёды складана адразу зарыентавацца. Пачынаеш гугліць і пашуковік нязменна выводзіць цябе на самае рэлевантнае і разам з тым папулярнае. Але папулярнае ня значыць якаснае. Гугл абавязкова вывядзе цябе на якога-небудзь Сяргея Савельева або Тацяну Чарнігаўскую. Ёсць шэраг людзей ад навукі, якіх вельмі любяць медыя за іхнія «неардынарныя і наватарскія» ідэі, за «альтэрнатыўны» погляд на некаторыя тэмы з вобласці навукі пра мозг. На іх часта спасылаюцца і запрашаюць на радыё і ў тэлевізар, каб падкарміць піпл простымі яркімі думкаміідэямі, хай сабе і далёкімі ад навукі. Але... Калі ты сапраўды хочаш атрымаць добрую базу па прадмеце «біялогія паводзінаў», пачні з Роберта Сапольскі. А пасля ўжо можна будзе азнаёміцца і з «альтэрнатыўнымі меркаваннямі», калі не шкада часу.
Акрамя таго, что ягоны навуковы даробак у вобласці нэйрабіялогіі, аўтарытэт і досвед маюць самае сапраўднае прызнанне на міжнародным узроўні, а ідэі і погляды ніяк не прэтэндуюць на хайповую «альтэрнатыўнасць», ён яшчэ і неверагодна таленавіты лектар. А гэта значыць, што нават не самы падрыхтаваны чалавек у стане зразумець, пра што ён кажа. А кажа ён вельмі цікавыя, карысныя і пацверджаныя навуковымі доследамі рэчы.
